കുട്ടികളുടെ രചനകള്‍ – ഒന്ന്

എഴുത്തുകൂട്ടത്തില്‍ നമ്മള്‍ ഒത്തുചേര്‍ന്ന് നടത്തുന്ന വായനയെക്കുറിച്ചുള്ള ചര്‍ച്ചയിലും രചനാപ്രവര്‍ ത്തനങ്ങളിലും നിങ്ങള്‍ക്ക് പ്രയോജനപ്പെടുത്താവുന്ന ഏതാനും രചനകള്‍ ഇതിനകം പരിചയപ്പെടുത്തി. സായ് വേദ എന്ന മൂന്നാം ക്ലാസുകാരിയുടെ ഒരു കവിത. പുതിയ വിഷയമൊന്നുമല്ല സായ് വേദ കവിതയ്ക്ക് തെരഞ്ഞെടുത്തിട്ടുള്ളത്. പൂവിനെയും പൂമ്പാറ്റയെയുംകുറിച്ച് പറയുകയാണവള്‍. പിന്നെ എന്താണ് ഈ കവിതയുടെ സവിശേഷത? പൂവ് (പൂക്കള്‍) വിരിഞ്ഞുനില്‍ക്കുന്നു. പൂമ്പാറ്റകള്‍ വന്ന് അവയിലെ തേന്‍ കുടിക്കുന്നു. പറന്നുപോകുന്നു. ഒരു അത്ഭുതവും തോന്നാത്ത പതിവുകാര്യങ്ങള്‍. എന്നാല്‍ കുട്ടി അതില്‍നിന്ന് കവിത വിരിയിക്കുന്നതെങ്ങനെയാണ്?

സായ് വേദയുടെ പൂമ്പാറ്റ പൂവില്‍ വന്നിരിക്കുകയല്ല, അത് കുഞ്ഞുപൂവിന് മുത്തം നല്‍കുകയാണ്. പൂമ്പാറ്റ വന്നിരിക്കുമ്പോള്‍ പൂവിനുണ്ടാകുന്ന കുലുക്കം ഉമ്മ കിട്ടിയതിലുള്ള സന്തോഷമാണ്. എനിക്കിത്തിരി തേന്‍ തരുമോ എന്നാണ് പൂമ്പാറ്റയുടെ ചോദ്യം. എന്റെ കുഞ്ഞിതളുകള്‍ വീണുപോവാതെ, എന്നെ നോവിക്കാതെ തേന്‍ കുടിച്ചോ എന്ന് പൂവ്. പിന്നെ അവിടെ കണ്ടത് രണ്ടുപേരുടെയും സന്തോഷക്കളിയാട്ടമാണ്. സായ് വേദയുടെ പൂവ് വെറും പൂവല്ല. പൂമ്പാറ്റ വെറും പൂമ്പാറ്റയുമല്ല. അവള്‍ തന്റെ കവിതയിലൂടെ പൂവിനെയും പൂമ്പാറ്റയെയും ആകെ മാറ്റിയെടുക്കുന്നു. ഇപ്പോള്‍ അവര്‍ രണ്ട് ചങ്ക് ഫ്രന്‍ഡ്സാണ് ! വീട്ടിലും സ്കൂളിലും നിങ്ങള്‍ക്ക് പരിചയമുള്ള അടുത്ത കൂട്ടുകാരാണ്. അത്രയുമല്ല, അതിലൊരാള്‍ നിങ്ങള്‍തന്നെയാണ്. അവിടെ സ്നേഹത്തിന്റെ, കരുതലിന്റെ, സന്തോഷത്തിന്റെ പ്രകാശം പരക്കുന്നു. ഇങ്ങനെ സാധാരണ കാഴ്ചകളെ സവിശേഷമായ കാഴ്ചകളാക്കി മാറ്റലാണ് കവിതയെഴുത്ത്.

ഇങ്ങനെ പുതിയ കാഴ്ചകള്‍ കാണാനും അത് വാക്കുകള്‍കൊണ്ടുള്ള ചിത്രങ്ങളാക്കി വരച്ചിടാനും മുതിര്‍ന്നവരേക്കാള്‍ കഴിവുള്ളവരാണ് കുട്ടികള്‍.